تاريغ ما اذ ئذارغ تاريغ ما اذ ئذارغ تيذارغ ما اذاريغ ما اذاريغ أسفرو س ئرس اث ئنيغ ئرا دجيغ ذ أنرماذ ذ أحوذري ذ أبريغ ؤسان ئنو عدان أم ؤصفض وا زريغ ثوذارث أم نضن ثقذاي ؤكيس رهيغ ئكسياي ؤسمّيض ئصوضاي وا ؤشيغ س ثطاوين زارغ س ئمجّان تسريغ كُّْورغ ذى أبريذ صوروفغ عدّيغ ئمرر ؤر ئنو ندخرفغ سهيغ كسيغ ئقرم ذ تدوات اذاريغ اذاريغ ثقسيسث ؤر اخاس فاجيغ اذسيتمغ ثوذارث تشجّارث ن سمّيغ اذهاردغ ئسقسان أفراكَْ اث عذيغ اذ سفسيغ أدجي ذ ربحار اث زويغ اذ سفسيغ أدجي ذ ربحار اث زويغ أشهبار محمد   طنجة: 07.2005

أفيثار بذان دواب س ئج ن ثزولث ن صواب مونن ذى أفيثار كور ئج ماي ئستخطاب أويد أغاش مارّا ارزّون رسباب ئسعوع ئجّنت ئحيّار أشطّاب ئرقف ؤماس ئشوضيث ذى أخنشاب ئفاقد زى ئضص ئزّاوح أزدجاب ئنّاس نش ذ عمّش ئفافا ئتقاراب ئمكٌنيث س ثشثي خ ؤذوكان ئمسيّاب ياراستيد ذي تّربيب ئسّهواث غا لَكاب ينّضّن سفانينن ؤذم نسن ئتنقراب ضحشن طراجان مايكا باب ن رغراب حد ثكّا خس ثفيرث ذى أنودم ئغاب ئزار عكشا زذاث نس ثسركّاب أبوريش ذ أكشكوش ئتبوع زي رمزوياب أنذا ئكّا ئعذا عرفن ئمنقاب أعكشيو ئضرس أزّونث تافن ئغاب أشهبار محمد طنجة  : 07-2005  

من ييفن سحاد ءا ثزيري ئنايد من ييفن ما ييف ثايري ن بوحبر ئعيزّن ما ييف ثيوانت ئ ؤر ن ئفّوذن ما ييف أريف ذ وأزري ييغيسن زغاري ييف أزير ئ ئنرماذن ييف ثجومي ن ؤذماون ئفرحن ييف ثوسنا ذ تايري ئزرياون سحاد سكَْنفاي س ؤسفار ييزضن س ؤسفار ن ثمّنت ئ ؤر ئتمذكاين جاي اذ سحسغ غا ثين ئد ئعيضن غا ثين ئد ئوشان أطيا ئ ؤراون جاي اذ سنغ ثموسّنت ئمارن اذ ضوغ اذارسغ أم ؤجضيض ئطّاون اذ زاذغ ذي ثوذارث ذ أباران ن ييفن أشهبار محمد طنجة: 07.2005

توغا نش ذ أحوذري   توغا نش ذ أحوذري يارزون خ ثايري تنكّارغ غا رفجار قّارغ ثغوري تكَاراغ ئدليسن أى ووفو اد ياري تاريغ ساون صوريف غا ون نضني سّقضاعغ مومو سوكَْضغ غا ثزيري ماني ثوّض ما ن أبريذ ئ ثوّي هاردغ ئسقسان نتاث ثروح ات غري كسيغ ئقرم اذ اريغ س ؤماري اذ اريغ ثقسيسث ماحند عاذ وا ثغري ات اريغ ذى أزرو س ؤفوس ئنو أفوسي أيثماث أكيذي كور ئج غاس أمزري كور ئج موخ ئصّوروف ذى ئجار ؤساشي كور ئج موخ ئعبار ئروثار س ثشري نتاري أيدّيم ئفاجن س ؤريري نتعفّاس ذى أحراس نتعطّام ؤنتيشي نسارواث رمطّاث ن ئرذن ذ ئمندي نتايز ذى أذيذج نتكيّار ئ ؤسيفي نتافيث ئمّش نتوكَِّْيث ؤيغدجي نخزّار من نكَّْار نتاف ؤيدجي أشهبار محمد طنجة: 2006-02-04

ءا ثوذايث ءا رعذو أهيا ثوذايث ئك يزون أريري ئساغن ثمسي عمارس اتخسي زغيراوم نشنين ؤنسّين ؤنغري نشنين نغرا نسّن أبريذ ماي ئتاوي ثوكّام ذي دّين نغ ثنّيم قا ؤيحري ثوكّام ذى أرقّاس ئديوسين ذ تزيري ثنّيم خاس أوارن ؤرا ذ ئج اثن ئسغري مونث ءا ئمسرمن سمونث أري مونث ذ رصفوف خ ؤذاي من ئفاري قنث خاس ثوورا س ؤر اذ ئحاري اذ ئسّن من ئعنا و أرقاس ن ربي اذ ئسن من ئفثر اذ ئسن من يوري اذ ئسن من ئنّا اذ ئسن ثموري أشهبار محمد طنجة : 2006.02.04

خديجة ئمار ذ أميمون خ ئمغرابيّن مارَّا س ين ئدجان ذا ذْ ين ئدجان ذِ بَارَّا خديجة ثورورد يوسد أكيذس أطْيَا ثوسد ذ تنمْراحث ذ تحارّيفث ئِتُوسَا ثوسد ذ تثبيرث خ ؤراون ثَاسَا ثوسد ذ تَنُوَّاشْث س ثُشّمرتْش ثُوغَا ثُوغا ذگ ئيْمَان ثوغا ذغيا ذَغْيَا ؤراون فاحن نُوْشن تْنَعْنِيعَن مارَّا رفراحث ئنْفَاح نوضات أك أياوْيَا رواشون أكٌلْذَان نش تْمنِّيغاسن رهنا تمنّيغاسن صَّحَّث ذْ رمعيزَّث ثُوعرَا أثن ئحفض ربِّ س رخير ن سُّوتْرَا أسن ئزاذ ذِي رعمار ثوذارث أتحْرَا أسن ئزاذ ذِي رعمار ثوذارث أتحْرَا أشهبار محمد تمارة:  06-03-2007

مايمي -1- مايمي، مايمي ءاي أثاراس ودّارن ثفراي ن ثفراس نّان أوار ذورن خاس ون ميغار تشناس ون ؤغار تطسناس -2- مايمي، مايمي ءاي أثاراس شّين رماشور ؤمغناس حرون ثودّينت ئرا ئتقاس سّاغن ثزذنت ئرا ئسّاس ارينث ذى رمبد ذ أخمّاس -3- مايمي، مايمي ءاي أثاراس ندين ثخشبين ذى رعراس ندين رمضاوز س رقواس غزين ثسافين ذى أفاس سّون رحاراش كَِّْين ئموجاس -4- مايمي، مايمي ءاي أثاراس دورو تمنغان خاس رمسكين ضحشن خاس أيوجير تكمارن خاس تّاجار تذارنّاس -5- مايمي، مايمي ءاي أثاراس ثدجسث ثدار أس أزير نخزار غاس ثرلي نتمتا خاس ثووري نازو خاس أشهبار محمد   طنجة: 03.2006

شنّا ؤشا شنّا -1- شنّا ؤشا شنّا، والله ئما شنّا شنّا ؤشا شنّا، دّونشث ئما ثشنا شا ثوشاس، شا ثكساس، شا ثجّيث ئفنّا شا ثنغيث، شا ثنضريث، شا شا ؤتجّي ئهنا شا ؤيعريم ثدّارث، شا ذي رقصور شبنّا شا قنن خاس ثوّارث ودّارناس ثمنّا شّيناس ايسوم زمّناس ثورا جينث ئتمراوا ئتاوي ئتارا -2- شنّا ؤشا شنّا والله ئما شنّا شنّا ؤشا شنّا، دّونشث ئما ثشنا شا ئقار كْ أكيذي اتافذ رهنا غير أكيذس ثكّذ روخن اش ئهنّا شا ئططس ذي رقطن يوفيت اموخ ثنّا شا ذي ثخزانت ذى فان ئتننّا س ؤزير ذي ثووري ئتفافا ئتمارا   س دجيرث خ ثجاثيتش ئتمتا ئتهارا أشهبار محمد طنجة: 15.03.2006

نتواخرقد نتواخرقد ئا ثومات انعبذ ئ ربي انيني قا ربي ؤكيذس حد نضني انزّادج ثزادجيث روقت ؤغ ثعدّي انغار لقرءان غا طيا ن ثزيري انمون أم ئضوضان انبد ئج ؤبدي انخزار ذى أجنا ثفوشث خمي ئدتاري انخزار ذي دجيراث ذ و أس مند ئتاوي انارزو خ ثذت ماي ثدجا اتدناوي انوجور خ ؤيفوس رحق اث نيني قا ؤلابد انمّث مايمي أغيمي دّونشث اتفنا من ذايس ؤيتذومي دونشث ثتيرار ثتاوي س ؤماري ؤر أعفان ثويث قاع وا دياري ؤر أصبحان ئسّن ماي ثفاري ئسن أبريذ نس ئمرونض ئباري أيّاو موخ غا ثمسار ئ ون وا غا سراري ون ئبدرن دّين ئبنّا ذي رخاوي ون ئحوسن ثمورث شار نس اث يكسي ون ئشّين أيوجير اتتش ثمسي ون يوعران خ ؤماس ياريث ؤيسوي اذيهوا غا ثيسي رحمو اث ئسفسي رعذاب اذ ئذوم ثفجّيرث ؤثخسّي رعذاب اذ ئذوم ثفجّيرث ؤثخسّي أشهبار محمد طنجة: 2006.04.22

ربي ئخرقانغ -1- ربي ئخرقانغ زى أشار ئمسرانغ ئكَانغ صيفث ثشنا ئوزنانغ ئخرقانغ ئج ئج ذ رجنوس ئسمونانغ ئخرقانغ نعرا س رغضا ئصارانغ ئخرقانغ نحفا س ثقشار ئسقنانغ ئخرقانغ نطراز س ماشّا ئتسشانغ ئخرقانغ نتفاذ س و أمان ئتسسّاوانغ ئفضلانغ خ و أطاس ئبريس ئحسذانغ ئ رعذوا أبرشان ئفارق جارانغ -2- ربي ئخرقانغ زى أشار ئمسرانغ ئكَانغ صيفث ثشنا ئوزنانغ ئخرقانغ ثمّنت زايس ئسجنفايانغ ئخرقانغ دواب خاسن ئكسيانغ نشنين ؤثنتويري نتا ئتوارانغ نترو نيغ نسّوار من نقّار ئتسرانغ نطّس نيغ نفاق ئج ئج ئسنانغ نجور نيغ نبد مايما يوذسانغ نوري نيغ نضار مايما ئزوورانغ -3- ربي ئخرقانغ زى أشار ئمسرانغ ئكَانغ صيفث ثشنا ئوزنانغ ئواطا ثمورث س ؤنزار ئسيفانغ يارزقانغ س رخير جارانغ ئوضانغ س نشنين ذ ئجضاض قاع ئوشانغ أمزيان أمقران قاع ئسياونانغ ورا ذ ئج ئدجوز قاع ئعثقانغ ورا ذ ئج ئفوذ قاع يارحمانغ خمي ئ نتمتا غا ؤشار ئتارانغ أشهبار محمد تمارة: 04.12.2006

ئكزّانن -1- اذاريغ أوارن خ رفعاير ئكزانن نثنين ذ ئمنعار ئ غاسن ئطراحن سخدامن راياح خ شواطن تشارن قّارن طراسم تارين شا ن ئسماون كسّين ئروثار تشدّان ذى ئحتّاون ذى ئمضران ؤينطرن قّازن ئحفراون ندّون ئحروزن سروغان ئسفضاون سنفاسن رحيوض سشماضن ئرماون سننّان ئمجّان تسشّان سحراون سنوفّورن ثذت مسحن ئزرياون تجّان بناذم أم ؤجضيض ئطّاون أم فاطّيو ئخ ارين ثفّاضين ئعراون ئحصرن ذي ثكعبونت يوزغن ئمّيسراون يارزون اذ ئنفك ئترون ئمطّاون ؤيزمّار وحذس ؤرا ذ ئج اث ئعاون -2- اذاريغ أوارن خ رفعاير ئكزانن نثنين ذ ئمنعار ئ غاسن ئطراحن سخدامن راياح خ شواطن تشارن تبخّارن س رخمج حما ادحضارن سقضاعن ثغماس طربّان ئشّارن تقزّارن أشنتوف نقرن تزوزارن تقارامن ئضارن روسن تقاهارن حطّان تقبارن س رخط خزّارن تكَّن ربهوث خ ؤغنزو ئقشّارن تكَّن أفير خ ؤذم ئشوّارن ئمنعار تشارن تازرن غا ئسحّارن انّين سخرافن تضفارن ئقتّارن ؤجين اذ ضفارن أبريذ ئنوّارن سمحن ذي دّين نسن غا ذفّار وخّارن ذي ثوذارث دّاغرن س رخاث اذ سقارن أشهبار محمد تمارة- الرباط: 16-11-2006

تسريغ سّوارن -1- تسريغ سّوارن خ شعايب تخاراصن قا ئتش ئتكّس ئ ين غاس ئطراحن قا ئتش ثحمريوين ئسجنفا ئحيضارن قا ئتكّس أشعاض ئ ين ئتبوهرويَن قا نتا ذ أمرابظ تراحن غاس طزورن طزورن ثوشايث نس س ثمغارين ذ ئريازن قا شعايب ذ رعجب ذ أغرباز ئغربازن ذايس ئرمذن قّاع ئمغناجن زّايس ئتفغن تذحان ذ ئمذيازن ذى أدجون تدزن شطحن تفوروجن ها ين ئطراحن طشارن ئقرابن ها ين ئتاوان سنوسان يوماين ها ين ئوطّان ذى شار تمخضواين ها ين ئتاوين أحوري ثناين ها ين ئشّاثن طواجن ذ ئغلاين قارناس ئ ؤمهروش ثجّنفيذ عراين -2- تسريغ سّوارن خ شعايب تخاراصن شعايب قا ئموث مساكن غا فارسن ئمّوتي زي ثوذارث غا ون ئث ئخرقن ذي رشفن ئث نضَنْ ذى أنضر ئث نضرن شعايب ذ ئج ن رعبذ ام ئوذان نضّن ؤيتِش ؤيتكّس ئشفا زى ئخاريقن نتا ئبرا زايسن ذ زي من خاس غنجن تغيراسن حيانتيد ؤسّا من خذمن بناناس ئسقفان ارينث زى ئمرابضن ارينث ذ رقيبتش طاوضن ذين طزورن ؤرا ذ توشايث نس زعما ثسجنفاثن ضفارن ئبريس رام ؤفين ئوّيثن تّون وي ثن ئخرقن ربي ئتوثن خران ثمزيذاوين مشا صبار اذ مثن اذ زارن من وا زرين خ يينا ئمّوثن اذ زارن من وا زرين خ يينا ئمّوثن أشهبار محمد تمارة: 11-11-2

يينا ذ أوارن يينا ذ أوارن خ ثوذارث ئفاثن ؤران س ئقرم س ؤر ذ ئمطاون شا ئذسن تذارن ودّارن ذى ئفقوسن أم ئجضاض ئطجيون س أفريون قسّن ئجنت ئغمّيد ينضن تكسن رباز ياحر ئجيثن تمروذن يارزف سّاني ئجيثن ذ ئواروذن جار ن كوز ن رحيوض ذ سموس ئخامن سضارع ئ و أبريذ غا ؤزّاكَْ ئفاكَْن ذي ثنكُْوتش ن ثمّنت مونن ذ ئفروخن وا ئضفارد وا كسّين ئمنوسن أم ئثبيرن يارقمن ئ غاسن خزّارن رعذواث زايسن تشدّان ئدشوسن رعذو ن ذيها ئروح ئكّيت سّن رعذو ن ذاني س أوارن ئستّن وخّا ذ تومات نسن س ثمكّا تكَّْن تقسن أم ئفغران ئطفين ؤرجام نسن مري ؤفين اذ مثن حما نثنين اذ اسن حما ؤتيرين ؤتيوضن ماي خسن حما نثنين اذ وضان ثغراسين جاراسن مشا عاذ اذ ئرين ذ ربيوز ئكاسن اذ ضون ذى أجنّا اد حوقن خاسن اذ سضون أعجّاج ذي ثطّاوين نسن ثذت اتضهار أم أنذا ئفسوسن أم ثسريث ؤنزار س ثفراس ئنوشن أم ؤذفر ذ أشمرار خ ئذورار ئمارسن أم ئثران يارقّن أم ؤيور ئبدّن أشهبار محمد تمارة: 07.12.2006. :p> 08-11-2006

أرْعِــيــذْ أرعيذ ذ ئج ن رموسَّن ذ أميمون ذ أصبحان ئتاسد كور أسكَُّاس فارحن ذايس ئوذان أمزيان أمقران خزَّارن غاس طراجان سَّاغند أحوري ذِ رغضا تِخْضَان طصبَّاحند ءَاسِين عذرن نْقَان طراحن زيش غا ثمزيذا طزادجان تباراكن رعيذ خ أيوْيَا خمِ ئتمرقان غير أذغاسن ءِ ؤحوري زِي ثسَا تسزوان سنَنَّان طزورن رواشون س ثِوثمين ذ ئوثمان فارحن ئوسُّورا فارحن را ذ ئسيْمان تنوَّارن و ؤراون س رفواح ن بنَّعمان س ثيماسا ثميْنُوت تسيقسيقن أم ئثران أم طيا ن ثزيريْ أم يُورْ يوعران أم طيا ن ثزيريْ أم يُورْ يوعران أشهبار محمد تمارة : 19-12-2006  

فران ئطّف لفران -1- فران ئطّف لفران ئخزار غا ئثران ئتواراثن رقّن س ثفاوين تسينيان ئتوارا يور ئبد ئسفضاون هوكَْان ئزرميثن ذى أرشام س مومو أبرشان س ئج ن رخفّث ارغين خسين ؤوضان ئسباح رحار طيا ئنّبزار ذى ئموشان ثجارد ثفوشث ثسضوّا ئجنوان -2- فران ئطّف لفران ئخزار ذى ئمضران يوفاثن ذ تجمّومت ستفن أم ئسرمان أم وا يا أم وا وّين شبار س رميزان وا ذين بو رفاز جا ن شّيخ ذ رقبطان وارا جا ؤفدجاح ذ رفقي ئسغوران ها ون ئرا ئدجان تحسابن خاس ئوذان ها ون ئرا ئهدّان ذى يوجير أمزيان ها ون ئرا ئتوعران ؤيتشّن ئزرفان ها ون ئرا ئسوضن ئضفارن شّيطان مارّا مّوثن ذورن ذى شار مقودّان -3- هيه يا ثوذارث من ذي ؤيدجي رامان أثاراس ئخدجقد زي ثودّينت ن وأمان ذى أعدّيس ن يمّاس ذي طرام ذ رحصران ئتفغد غا دونّشث دجيرث ذ وأس ذ ئغويّان ئماس ثقابر قا ذاس تيوش شا ؤسنّان باباس ام نضن ئتنقثمار أك زمان خمي ئد غا ئمغار ئري ئكَّا ئضان باباس ؤث ئتحسيب ئتوندروج خ ئوذان ئنهّض خ يمّاس ئتو ويث ياربّان ئتو ويث ئسّوطضن ذ وي خاس ئحبابان ئتو ويث ئسّشّن زى ؤقموم س ئضوضان ئتو رحنونيث ئ ذاس زاعن ذى ئزوران أشهبار محمد تمارة - الرباط: 18-12-2006