ئمسّاسن -1- رمسكين ئتحير ذى ئذسن ئمساسن زرينث غاس تاذسن تمراياسن زرينث ذ أمزروض اوكرن تمخنّاسن مرا ؤفينت خاس روخن ثشناسن مرا ؤخاس توفين ابّون تساياسن عماس نثنين سنن وخّا ثمريذاسن عماس اث ارحمن مرا ئقيمد غاسن ذورن أم ئفغران تقسن سكاواسن وخّا تومات نسن مرا ؤفين اث فاسن مرا ؤفين اث قسّن وخا ئتروياسن وخا ئتزدجيز مرا ؤفين اث جاسن -2- ئسقسا ثزيري ثناسد ئنياسن ئهيضار ئ ثذريم عاذ اذقّاسن دّيختش ئ ثندوم أطاس ئسكّواسن اتغمي ذى أذوف ذ تزولث ئمغناسن نثنين ئثيجّين ئذحا زى ئخمّاسن كسنّاس ئ نتا نثنين ؤشيناسن ثغاغيسث ئ ئسّند شينت محواسن جّينث ذي رفقس كَِْين ئعساسن مري ؤفين اذيمّث حما نثنين اذاسن حما اذوضان ثغراسين جاراسن عماس ئثارناس ورا ئقساسن عماس ئما ئنّا أوار ئعجباسن أوار نس ئقّور ذى أذوف ئشوراسن أشهبار محمد طنجة: 01.12.2004

ثعجيج ثمورث ثمورث ن أريف أطّاس ثقيم ثسقار أطّاس ئسكّوسا ثسغارث ثتواقطّار كور حد ماي ئجبذ كور حد ماي ئتزوغار حد ئسّيريو أحسي ئنقّع ئتعمّار نهشن محاواشن تشيّانن ذى أنوفّار ئج ن ثط ؤثزري ئشت ثزرا ثمضار ثمورث ئقساس رحار ثكّار ثنّا مغار ثنده ذى ئمطاون خ ثذت وامي ثودّار وامي ثوفا همرنت ارزيناس ئسوغار ئسّيورد ؤر نس نهزّن ئذورار نهزّنت ثزدّيغين كور ئشت موخ ذاس ثمسار ئشت ثهواد غا ثيسي ثنّضن ثفزّار ون ئموثن ئنضر ون ئفرثن ئدّار ئنّخرع ؤسينو ئضرقد ئ ؤنزار ننّخرع را نشنين سّا ذ سّا نتناوار ناور زي ثزدّيغين ذى أعشوش نتنوفّار ئفّغ ذاينغ رحار كور حد مايس ئمضار ثووري ذ تغوري ؤرا ذ ئج ياراسد رخبار مارّا ثقّار ءا بوحبر يا رعمار ئوّض رخبار غا ؤمضال ئسّن موخ ثمسار أيذوذ ئزرا مارّا موخ ثوقع زى ؤمزوار ؤسند س رمونياث فوس نسن ذ أزيرار زمارغ اذ ئنيغ ئج و أوار ئمغار مشا قا ذ تذت ؤذين من غا ننكار ون ميغار ئكسي ون واغار ئخزّار ون ميغار ئكسي ون واغار ئخزّار أشهبار محمد 2004

ثِـــــيـــــــــــري مِنْ زغاري ثخس ثشحشاحث ن ثيري أقت ربدا ثاسق ماي غا ئريغ أتيري مرا كُّورغ ثتصنَّاعاي ثشري ثمغَّار ثنقَّص تواريغت ؤيثتويري مرا بدَّغ ؤثتاوي ؤثتاري ضار ذى ضار شدَّن أم و أريْ تسقسيغت ثدُّهْشَار ؤثتسري سَّوارغ غاس أوار وا خاي تَّاري خمِ ذ أغدجاي ثتذوار ثبُّوري ثطراجا ثزيري مرمي ئد غا ثاري حما غاي تذْور أكِي ثشاش ثشري مِنْ زغاري ثخس ثشحشاحث ن ثيري أقت ربدا ثاسق ماي غا ئريغ أتيري سحَّاد مرا ضوِيغ خرفاي شم ءا ثيري أموخ ئشم سنوفَّارغ زى ثفُويْث أرمي ثغري سنوفَّاراي را ذ شَّمْ زِي ثِقَّخث ؤريري مرا ثخسذ أتيريذ برا نش غا ئري مرا ثخسذ أبدّر ، أبدّر ؤيحري مرا ثخسذ رفراق ، رفراق نتَّا يوري آس ئد غا ياس نشنين ؤنتمويري آس ئد غا ياس نشنين ؤنتمويري أشهبار محمد الحسيمة : 03-11-2003  

زي وامي تعقارغ -1- زي وامي تعقارغ نشنين نتنقثمار زي ثمزي نخدّم نتنكّار غا رفجار نخدّم س ئج ؤفوس أنقصي ئج ؤضار مرمي ما نصّورف نوطّا نتنكّار مرمي ما نضوا ئري ئخطّار و أفار -2- زي وامي تعقارغ نشنين نتنقثمار زمان يوفيت خانغ يارانغ ذ ئمعضار ئكسيّانغ أم ئزرا كور ئج ماي ئث ئحجّار كور ئج ماي ئث ئعوّذ كور ئج ماي ئث ئندار ذي ثوذارث ؤنزبار ندّار أمّن نودّار -3- زي وامي تعقارغ نشنين نتنقثمار ؤر نّغ ؤيهني س رعقر نتفكّار نسّيتم غا طيا ادياس اث نزار انوكَُْور غا زذاث س ثشري انكّار انيري ئ أياويا عماس انمخطّار -4- زي وامي تعقارغ نشنين نتنقثمار نخزّار ئيمارن نعبّار س ئروثار أبريذ مايس غا نك نتافيث ئحفار ثبنعمّوت اينّي ثوّض ثتضفار ثحطّانغ ثتقّس أم ؤفيغار أشهبار محمد الحسيمة 31.12.2003/01.01.2004

أشهــبــار نش ذ شّك نمسوار ءاي أشهبار شك ذ ئسم نش ذ أمحضار نمون ذِ ثوذارث نتمعشار نش تفكّارغ شك أكَُ ثِزمَّار رعقر ذ رحواض ئسِّيجَّن خ ربحار كور رحوض س ئبوذا ئسطَّار كور باذو ئسَّغميد نوار ئتكنَّا س شك ءاي أشهبار نش ذ شّك نمسوار ءاي أشهبار شك ذ ئسم نش ذ رعُنصار سحَّاد مرا ساخغ غاش ؤشا فكَّار مارَّا من زمَّغ غاش أذ ئودَّار رخير ئغا ثكَّْذْ من ما ذِن وا نكَّار مَّر مانِ ذ مرمي نمسكَْار مَّر شحار ذ ؤسَّان ءِ نمعشار ئِري شك ذ نّش غار آس أنكَّْار أشهبار محمد الحسيمة : 2-3\11\2003  

ثمازيغث ثْمَـزَّغْ ثـمــازيغــث ثْمَـزَّغْ وا ثْنَــزَّغْ ثـمــازيغــث ثرقّـح وا ثتـازّغ ثـمــازيغــث ذِ ؤراون ثـزذَغ أمّيس أمغناس عمّارس ئمسغ عمّارس ئقّن ثسيريث ثفسغ عمارس ئنّا ذِ ؤبريذ أوكْذغ ثمازيغث ذ تزيري نشنين غاس ئخزّارَنْ ثمازيغث ذ ئرس نشنين خس ئـدّارن ثمازيغث ذ أجنّا س ئثران ئتريسِّيـقن طْيا نّس ئمّوشن ءِ مارّا وت ئخسن ءِ ؤمحضار ذ ؤسيْمي ؤمِ را خسن أتكْسَن ءِ ؤمازيغ ذ تمازيغث أم وازْْري يارقّن ثمازيغث أترقح ذِ ؤراون أتغمي ثمازيغث ءِ ؤمازيغ ءِ ؤمحضار ذ ؤسيْمي ثمازيغث ذ ئرس س ؤفوس أتناري ذِ رمواج ن رعوين س ئرس أتنيني حما أتقِّيم نّغ زِ وا غا ون نضني أم ثفاوث أم ثفوشث أم طْيا ن ثزيري أشهبار محمد الحسيمة : 18-01-2004  

أفغور -1- أفغور نتا ئزار ئكسي أوارن ئتباسار ئرقض ئوذان من قّارن زي رقهوا يا غا ثا ركراسا ئحارن ئسس ؤيتخدجيس ئتغدجار ئفارن ئتاري ئطّار ئتهزّا ئضارن زعما قا نتا ذ أسرماذ ئمّارن -2- أفغور نتا ئساح ئتقهار ئفغورن ئتنفراكَْ ياروكَّْر ؤيحمّر اث هورن ئتاراد س و أعرور ئطراجا اث حاورن ئطراجا اذ ئفاذ روخن اخاس عورن ئخزّار غا رجيوب مايكا ين ئشّورن ئتنيّاش ئتمكَّْان ذى أفان ئضارن أشهبار محمد الحسيمة: 2004

كسنّاي ئقرم كسنّاي ئقرم دزنّاي فوس ئنو ئفتيتز ئنّزبار رحّيق ذايس ئعذو ئفقّوسن ذى ؤر ، ؤر ئنو ئسندّو عيضغ غا ثزيري راغيغ يمّا حنّو سرانايد ئذورار ثمورث ثدّيدرو ئسرايد ؤصمّيض س أضو ئد ئحتّو ئمارثاي ئخسان ئسّرقاي ئ ؤغدّو ثهارزاي ثوذارث ئ ثفقّحث ن خدجو ثجّاي ذى أنخسس أس ؤيعدّو ئيسيغ أكروشي اذ نقشغ ئسم ئنو اث رشمغ ذ أسدّاش ن ؤذمام ذى ؤزرو ذ ئيجار ن بنعمان ئفاجن س ؤميرو اد يغمي ذ تقسيسث ن ؤزمّي و ؤر ئنو ات ئغار ؤمحضار اذ ياجم اذ ئسو اذاس ئسرا ؤغريب س ئمطّاون اذ ئرو ات عيارنت ذ تينيبا ذى ؤرار أمنزو خ ثعورا ن أريف ذي سمايم ؤنبذو ذي رعوين أسمّاض ئتكسن أرخو أشهبار محمد طنجة: 12.2004

كُّورغ تسقسيغ كُّورغ تسقسيغ خ ؤسان ئمزوورا ؤسان ني ئعذان ئج ن زمان ئفرورا تسريغ صورف ؤكَُور ئذورار ذ ثعورا قنّب أوارن سفارز ؤسشورا سقضع مومو حفض من نسغورا اقّذ أرومي سراق اذ ئمرورا ون ئوثين س ربوقي ئسوكَّد س ئمذرورا ؤسند اذاذرن أريف اثارن ذ ئنورا ؤفين ريد أمني س ئجيجن ن ثعورا ءاي أدهار ؤبارن ئذاسن ئزمّن ثورا ءاي أنوار ذ ؤعروي ماي مونن رذشورا ذين ئكَِّين ثويزا سندن ئمذرورا يين ذانغ ئجّين انّقّر نسضورا نزعف ذى ئفاسن مغار ذ ئمعضورا ثمورث نغ ثمّوش غا ميدن ثمسورا ثوذارث نغ ثمجار ثموزغا خ ثوورا ثودنت ئ زي ئرا نسس ثذقّس ثشورا ثشنفث ئ زي ئرا نتت دمنت ئمكُّورا أبريذ مخ ئرا نكُّور ئحفار ذ ئصورا ئسّو س ؤفراش ئندي ذي ثغمّورا سويا نشنين نقيم غا ذفّار ننجورا نخوا ثمورث نخرا ثدّورا نمسياب نودّار ذ ئمتلاع ذ ثمورا مشا عاذ انكَّار انسّاغ رفنورا اندّار ؤسان ماني ئد نرورا انحوض ثبحّار انار ثشجّورا يزري نغ أمنزو اد  ئغمي خ ثعورا لمغرب اذ ئنوّار اذ يارزم ثوورا اد ئمغار بنعمان انراح ذ ئمزوورا أشهبار محمد طنجة: 2004-12-03/04

يازّا ئسوكَّد خ ثزيزوا -1- يازّا ئسوكَّد خ ثزيزوا ئوّيد اكيذس را ذ ئبازّا ئشاه أمغار يازّو خاس ئقضا يازو اذاس ئكّس سّلطا حما خاس ئستولا ئناس اتفغذ أسّا نيغ ثوذشّا ئخسّا ؤشتويريغ ذي رحكاما حسن زى مارا نبذا ذى كَِْيرّا قا مرا ثوكيذ اذاك كّغ سيمانا اذاك نغغ لجنود اذاك اويغ من ذا اد صبحغ ذ نش ئغا ئطريّان ذا ؤرا ذ ئج اد ئكّار اي ئسّوفغ سّا قا نش جهذغ ؤيزمّارن ذى زمانا قا نش غاري تّطوير ن تكنولوجيا ؤسيغد اذ كسغ دّكتاتوريا حما اذارغ ذين ديمقراطيا ازّوغ اذ اسن ؤشغ ئ يينا ئزرفان ئ ذاسن ثكسذ ئرا حما اذ ئذارن ذي رهنا -2- يازّا ئسوكَّد خ ثزيزوا زعما ئفهم ئضدجعد ثسيرا ئحزمد ثعواط س نتا ذ ئبازّا تسوكَّْاند خ لعيراق وا ئتضفارد وا شاثن قّارن قا نكَْا ئشتّيحن وا خ وا رخبار نسن ئخوا روخ انراح غا دجلا ايمارند سّني ئيازاز ثيوكَْا قرعنثند زى ئغونام كَِّْين خاسن لحايحا سقسانثن مايمي ئتوسيم ذا ناناسن زغيرانغ نتسارا ئفغ ريد أمّن ؤشا نوضاد ذا نوضاد زي طيّارا غا ثمورث نراقا رقاناغد س كانوها ئخفيفن وا خ وا ؤنوفي من غا نكَْ نصمّط أك اياويا ماي ما نخزار ثمسّي سّا ذ سّا روخن نكسي ئفاسن نفغد غا بارا طفنّانغ مارا اري

سذورد -1- سذورد مرا ثسنذ ءا ون ئتيذارن سذورد خ ئسقسان سحس ئ أوارن من ئجّين ركَْنوس اقاثن تمشاواين ؤذاي أى فلسطين ضورن ئمنغيّن لقدس ئثينن ازّون اتاذرن ازّون اذسودّارن ريماث ئ ئمسرمن مشا ؤزمّارن اذاوضن ماي خسن أمسرم ذ أمسرم ؤدجي وث غا ئبدرن ؤدجي وث غا ئمحان ؤرا وث غا ئكسن -2- سذورد مرا ثسنذ ءا ون ئتيذارن سذورد خ ئسقسان سحس ئ أوارن من يازّو أماريكان ذ وي اكيذس ئتعاوانن من ازّون غا لعيراق ؤم ذايس شّاثن ما ازّون اذبدرن صدام اث كسن ما ازّون ؤيتيري ؤيتوعري  خاسن ما ازّون اذيوكَُْور ثشري ؤفوس نسن ما ازّون اذحكمن رحكام نّي غاسن اذيسين من غاس زّايس اسغاسن اذيسين من غاس زّايس اسغاسن أشهبار محمد الحسيمة: 2003

حمّو ذ حمّادي -1- حمو ذحمادي زي ينّي ئتواعنان شحار ئسيورن شحار ئك نّان ئج ئقار اذكَْغ من وا كَِين ئوذان اذبنيغ رندينث سضارع ئ و أمان اذايس حيرن ئوذان اذقّيمن صعان ئج ئقار اذاشبغ ئضوضان اذعجنغ س ؤراثار اذنقرعن ئثران اذضوغ اذاسغ غا راوان ئجنوان ئنايد ستخايلّه من خسن اذذحان ئج اس ثينيذ ذ ثكُويث ئج ذ أبادّان خارصن تون ما اذمثن ما اذدّان ما اذ ييري ئج زايسن ذ نتا غا يزوان -2- روخ انراح غا ون ئراحن أليمان ئضوا س أفريون مشا يوكَا خ ئضان ئخذم عامين ئقيّر خ لبيران ئسحس جيب ئحما ئتوارا ئروان زمان ئندهيث ئقنيث س ئصغوان ئضفار ئرومين س ؤر ذ ئخسان أشعور ذ أزيرار ئهاكوسن ن برودكان ؤذم ن بناذم فورما ن شيطان خمي ئكُّور ثشري ن شارلي شابلان ئبذا ئتحدّاث ئتغاغرا ئوذان قا كّيغ صبانيا ذ فرنسا وضغ أليمان خمي ئساوار من ئقار أستق نيشان مشا نتا ئخراث ذين زمان ئتنوفور ماي حضارن ماي ؤحضارن ئتبان زرينث ئحوذريّن مارا ازّون اذزوان مان أبريذ غا تبعن بذان شاثن بلان تفغن ذى ؤغرابو ستفن ام ئسرمان ام رفروكَْ ئتبانن أى رمواج تمنغان ئج ئفدجث عشرا عشرين تمتّان سّاغن رخاث س بوحبر ئ ئسوان الله ئحسنعاون ذ زمان ئتينّان أشهبار م