فاق شك سفاق -1- فاق شك سفاق اذ فاقن ئوذان قا مارّا انمّث انذور غا ئمضران انذور غا ؤشار غا طرام ذ رحصران اموخ ذورن رجنوس ئفاثن عذان شحار ئرا جهذن امن نثنين فنان ئقيم غا من كِّين ئصبح ماذ أعفّان مايكا رقصوراث ئرا زذغن بنان ئزوقن سرزواق ئريون ؤعران قّاع فزّارن قشّارن اذرن وضان ذورن ذ ئخابار ئثباب نسن محان ئغميد خاسن أربيع ذ بوزيزو ئقوان يوزّغ عاوذ ئغميد ؤسّان تراحن قطّان ام وأمان ئتازرن بّاروين نيغ صفان ئهوكَّان ذي ثيسارث ئتفغن غا ئغزران ئتاوين غا ربحار ن ثوذارث يارصّان ثوذارث ويس سين ثني ذانغ ئطراجان اتيغ اغاس نانف انارزف ذي رامان س أرحمث اتناذف ئمسرمن اترقان 13/25-02-2007 -2- فاق شك سفاق اذ فاقن ئوذان قا مارّا انمّث انزذغ ئمضران شك ذ نتا ذ وين ذ يِن ذانغ ئ تسران ئنيثايد ماي كّين رجذوذ نّغ ئ عذان ئك ئقذن أرومي جّين ذايس أسنّان ئنيثايد مايكا باباثنغ أمقران ئك ئمسر ربي ئكَّا ذايس ئيمان ماي كّين ئرقّاصن ئد يوسين اذ هذان ادارن غا ؤبريذ اذ سفاقن ئوذان حما اذ عبذن ربي اذ عصان شّيطان مارّا مّوثن ودّارن ذ شار ئذحان مايكا نوح ئك ئترون ئروبان رقوم نس ئغاق س طّوفان وا ئبان مايكا ئبراهيم ون ئذانغ ئس

صَّحرا ذ ثمغرابيث صَّحرا ذ تمغرابيث نشنين ذ ئمغرابيَّن صَّحرا نَّغ ؤدجِ ن حد نشنين ذ ئحوريَّن نشنين ذ ئمسرمن دِّين نغ ذ ئجَّن زي طنجا غا لكَْويرا ثمازرث نغ ذ ئشتن ثمازرث نغ ذ المغرب أزدجيذ نغ ذ ئجَّن محمد وس سضيس ذ ربِّ ئث غا يجَّن سبَّانيا ذ ون اكيذس من غانغ توشن من غانغ رزُّون وامِ ذانغ حسذن س نتّاث ذ رجزايا ذ بولِزاريو تشحن تيزين ءِ ثمسِّي اتاغ ثخسِّياسن صَّحرا ذ تمغرابيث ؤثدجِ بو نسن أيذوذ أمغرابي ئشهذ يارا خاسن ئسمون أوار نس ئسمون را ذ ئفاسن ئناسن قا نشنين ؤدجِ ذ ئمحراسن ؤياكْ ثمُّورث نغ نشنين نغرا نسَّن نشنين ذ ئحوريَّن ؤدجِ ذ ئروميَّن س ئريفيَّن ذ ئمازيغن ذ ئسوسيَّن س ئغابيَّن ذ ئشلحيَّن ذ ئصحراويَّن نشنين مارَّأ نقَّار قاع ذ ئمغرابيَّن شبار ؤشار نغ وا ثتوين ئمشوشن صَّحرا ثمُّورث نغ ئيَّا ما اذشوشن صَّحرا ثمغرابيث ثنوَّاشث ئنوشن صَّحرا ثمغرابيث ثنوَّاشث ئنوشن أشهبار محمد مْنود: 28-11-2010  

ؤريغ أوارن ؤريغ أوارن ؤرجيغ عاوذ ؤرجيغ نِّيغ اذ سمونغ ذى ؤدلِّيس من ؤريغ بذيغ تازرغ ؤحرغ ماذ سَّقسيغ ئتسغاي ثكَزاوث ون ؤمِ ئت غا ئنيغ ئقَّاراي ندار سَّنِّ مشا نش تَّبريغ ؤر ئنو ئحار س ثمازيغث اذ اريغ اذ اريغ أوارن ثقسِّيسث ات ئنيغ من غاي ذى ؤر خ ثوريقث اث سَّفسيغ ئخسَّاي اذ سنَغ ما ن أبريذ ئكَْ وِّيغ ؤياكْ نش زي المغرب ذ أريفي ذ أمازيغ غاي ثقسّيسين كور ئشت موخ ئت سمِّيغ أوار ئنو ئفسار ؤ غاي من غا ئنيغ اد ئفَّغ ذ أدلِّيس رقندارث ات عذيغ ربحار ئنهورن س ؤصوريف اث زويغ فوس ئنو ئتقسن س ثيرا اث سكَْنفيغ أجنَّا ئزَّكَْزون نش اخس داويغ ثوذارث ئنوشن اكيذس مرقيغ ؤسَّان ئروحن اد ذورن اذ هنيغ س ئقرم اذ اريغ س ئرس اذ ئنيغ اذ اريغ أوارن ؤر اخس فاجيغ اذ اريغ أوارن ؤر اخس فاجيغ أشهبار محمد امنود : 25-11-2010  

شك ءا رحد -1- شك ءا رحد ذ تمّورث ذ تقيراط ن و أمان شك ءا رحد ذ رعراسي أوار خاكْ ذ أمقران شحار ئ ذاك اوسغ ذىْ أرمو يَقوان ذىْ ئغدج ئمندي ئمّوذن ذ ئفيران ذين ثارجا ؤذمار ذ ئغونام ذ ئريران ذ ئخشّوبا ئمشوبشن ذ تنمرار يوعران ذ ؤشطوي ذؤحاري ذ تزيزات ذ ؤغودان ذين رخار مسقّم ذين رفيراس ذ أرمّان سّين ئشّيغ ثابغا وامي دجيغ ذ أمزيان سين ئسويغ أتاي س رفواح ن بنعمان س رفواح ن نعنع ئسرقاحن ئمان -2- شك ءا رحد ذ تمّورث ذ تقيراط ن و أمان ئغزار ئحمرد ئشّور ؤيجّي بو أمشان ئكّيد ذاك ؤشيعزير ئزارب ئزوران ئوي من را ذين س ئكْميرن ذ ئبورسان ئقّن ثاكوّين ئمقصارن توامحان ثغميد ثمّايث ذ ؤزراف ئتشوكان ئكّس أفراكْ ئسودّار ئث ؤيقّيم ئتبان ئذور ذ ئجار ئمون من را ئمسوضان حد ئزرا س ثط حد ئتسرا س ئمجّان أغزار ئكّا ئعذا ، ئعذا من ئعذان ئندو من ئندو ئهوا من ئهوان أشهبار محمد امنود : 23-11-2010  

أذسّيورغ ئعين ئطّوقز ؤر ئنو أذسِّيوْرغ ئعين ؤريغ أوارن ذ أرغ خ ثوريقين أوارن ئگ ؤريغ ذحان ذ تِقسّيسين شا ئبان شا ئودّار ؤحرغ ذي ثازرِيوين أوارن ئگ ؤريغ تتّارغ أذيرين أذمونن ذي ركتاب ذ باندو أذارين ؤحرغ ما أذسيورغ أيتسران ؤيتسرين ؤسّان تْراحن تاسند أذقظان ؤقطّين ثوذارث ثكّور أ زذاث ؤثتذوير ثِشامين أجنّا س ؤزير ذ أزگزا، س دْجِيرث ذ تِفاوين ثِفاوين ئيَثران يارقّن ؤُيخسّين أجنّا خمي ذ أسگنو ثزيري ؤثتبِين ءا ثثبيرث ياسين س رحنّي خ ثطاوين كْسي ثبرات ئنو سِيوضيت أ ثين ذ وين أتيسغار ون ئخسن ذ سرام ؤيتنحدّين مْراسن ئسمينو ذگ أزرو أثارين مراسن ما أذسنن من نْتَعنا نشنين نشنين ثاوَا ن ثْمورث س راصر ؤيْتمَنزين نشنين عاذ أنيري ذ رَبْيُوز ؤيْتمَنغين أنضو س و أفريون أذارزن ؤطازّين أناري خ ثِرلّي أنغنّا ثِوارين أشهبار محمد امنود   : 20-11-2010  

س ئقرم اذ اريغ س ئسم ن ربِّ اذ بذيغ س ئقرم اذ اريغ اذ اريغ ثقسيسث غا ميدن ؤت تسريغ ثقسيسثا ئنو س ئرس ئنو ات ئنيغ كَّاميغ اذ سخيغ زي ثيرا نش تبريغ زي ثيرا ؤساشي قَّارغ تكَْنفيغ رعقر ئرا ئفّغ ئذورد وا ؤكِيغ قّارغ من تواريغ تسيفيغ من تسريغ شا زكَْ ؤسّان تقيّارغ تارجيغ نش ذ رعبذ ن ربِّ أوارا اث ئنيغ زي حد وا توكَْذغ زي ربِّ تعججِّيغ مرا ئخس ربِّ مرا مُّوثغ فنيغ مرا توانضرغ مرا أشبار ئكْ وِّيغ مرا ربّي يارحماي وَخّا نش خضيغ مرا يارضا خافي سعداتِ اذ هنيغ اتِري را ذ نش اذ صفيغ اذ نقيغ غا جّنَّث ئكُ ئخس اتيغ اذين ئريغ غا جّنَّث ئكُ ئخس اتيغ اذين ئريغ أشهبار محمد 16-11-2010  

ؤياكْ نش ذ نش   ؤياكْ نش ذ نش س ئذمَّن ذ ئزوران نش ذ ئجن ؤدجِ ذ بزَّاف ن ئوذان نش ذ بناذم ازُّوغ ثذت ذ رَمَان ودَّارغ ذك ئخف ئنو ؤياك نش زك ئوذان ام نش ام نثنين مونن انغ ئزرفان خزارغ غا ؤستِّيف ئن ن زَّاج ئن يوعران تواريغ ذين ثفاوين يارقن ئتسِنيان ماذ تيرناث ئعين ما وا تواريغ نيشان خزارغ س ؤزير مانِ رمذن أنداه هان تواريغ ثمسُّوكَْارين ذ أشمرار شا ذ أبرشان ئزْوغ شا ذ أشحشاح كورشي موخ ئتبان ندهغ س رعقر ذ ئفاسَّن ذ ئضوضان طارغ زِي ثا نايغ ذِي ثا زكَْ ؤمشان سزُوَّارغ ثا سوَخَّارغ ثا استيق نيشان درهم ذِي جِّيب ذ ونضن ذ أمزيان خسغ اذسنغ ثحنيا ن ثفاوث ئتنهزَّان ذ تمسوكَْارين ئكَْورن ذكَْ ؤبريذ ئسروغان سروغانت ثفاوث كور ئشت موخ ثتبان ذ ئوذان ئطُّوكويَن تارين هوكَْان خسغ اذسنغ ما من تواريغ نيشان ما س ثذت ما تارجيغ ما بَّاروين ئزوران ما س ثذت ما تارجيغ ما بَّاروين ئزوران أشهبار محمد 10-11-2010   Mohamed Achahbar · ؤياش نش ذ نّش

بيَّا يا الحسيمة بيَّا يا الحسيمة نش ذ أمّيم ذ أحُورِيْ مايكا ون غا ئسخان زِي ثمورث ماي ئد يوري ئلاَّ مرا أثَرَاس ئدّاغر ؤيتْويري نيغ ئروحاس رعقر ئذْوَر ذ أبوهاري أرّيف ذ بنَّعمان ؤدجِ ذ نوار ؤريري أرّيف ئسْوَا ثمنْزيوْث ؤيتمنْزي أرّيف ذ تَشجَّارث نشنين ذايس ذِي ثيري نشنين ذ ئمسرمن دِّين نغ واثنزنوزي بيَّا يا الحسيمة ثشجَّارث ن ثِنِيْ ئتفوح زَّايم رفوح ءِ ؤر ذ أكَْنفي ئزوراكُْ نم سّكّن عذرن أسكّي ربحار نم ئزذيكُْ ئعذر ثزذوكِي شم ذ رمدينث ذايم ئسّعذوغ ثمزي ئرا دجيغ ذ أمحضار ئرا دجيغ ذ أحوذري ئرا دجيغ ذ أمحضار ئرا دجيغ ذ أحوذري أشهبار محمد 27-10-2010  

ءا الحسيمة ءا الحسيمة خرْقَغ ذايم شم ثمّورث ئنُو ئسم نَّمْ ئصبح ئغزا ذكُْ ؤر ئنو ئزريْ نّم ئنوّار ئسّاغ أبريذ ئنو ربحار نّم ئشنَع ئسِّيزذَكْ ئرَمْ ئنو ئسّاكْنَاي ئخف أريغد رْبَار ئنو أمان ذ ئزيزاون أم ؤجنّا برا أسينو ون ذايسن ئتاذفن ئتذحا ذ أمَايْنُو شم يا الحسيمة ثزذغذ ذكْ ؤر ئنو شم ذ تسريث ؤنزار ذ تسعذيث ئنو نش ذايم ذ أمزذوغ شم ذ رمدينث ئنو نش ذايم ئسَّعْذُوغ ؤسَّان ن ثوذارث ئنو تَتَّارغ زي ربِّ أذ ئسَّسْعَذْ ؤسّان ئنو أذ ئسْضوَّا ئروثار ئجِّين رَثار ئنو أذ ئكّس ثِوْكْذِي ئقسَّن ثْسَا ئنو مرا قضاناي ؤسَّان ئوْضَد نْهَار ئنو مرا ئخس ربِّ مرا ئطَّف بوحبر ئنو ذِي ثوذارثِين أذ ئسْشَمْرَرْ ؤذم ئنو غا جّنّث ئكُْ ئخس أذ ياريْ ذِن ئسم ئنو غا جّنّث أي ئسِّيذَف ؤدْجِ س ثْوُورِي ئنو س أرحمث ئنس أذ يارحم رعمار ئنو ثوذارثَا أتعْذا سُّوفْغَخْتْ زكُْ ؤر ئنو ثوذارثِينْ أتقِّيم ثوْيَاي رْبَار ئنو أشهبار محمد 12-10-2010  

ءا ون ذاي ئخرقن ءا ون ذاي ئخرقن شك ذ ربي نش ذ رعبذ نّش سبعّذ خافي ئبريس ئفعن زي أرحمث نّش سهوناي ئبريذن ئتاوين غا ؤبريذ نّش هذايد غا ؤبريذ ن رحق س ثزمّار نّش سشمرر ؤذم ئنو س طيا ن النور نّش نش ذ شك ئعبذغ ؤعبذغ حد اكيذش ءا ون ذاي ئخرقن جاي ربدا ذي طاعث نّش قا نش تشهاذغ ذ شك ذ ربي وحذش ؤذين حد ئمغار اد ئمقُدّا اكيذش تشهاذغ محمد النبي ذ الرسول نّش يوسد ذ أرحمث ئويانغد أوار نّش ءا ون ذاي ئخرقن خزارد غا رعبذ نّش نش ئخضان دونيث تروغ جار ئفسّن نّش توب خافي غفاراي سدوراي ذي ثيري نّش غا جّنّث ئ ثخسذ سيذفاي س أرحمث نّش أشهبار محمد 09-2010  

أوار ن ربِّ أوار ن ربِّ ئمغار ئتصِصْفا ؤراون أوار ن ربِّ ذ طيا ئسضوَّا ؤذماون أوار ن ربِّ ذ ركنز ذايس من ئفاثن ذايس من ذي ندجا ذ مِند غا ياسن أوار ن ربِّ ئشنا ئسَّفطين ئخفاون أوار ن ربِّ ؤغاس انِّين ؤزَّايس سَّنقيسن ئمَّار انغ من ؤنسِّين حما اث نسَّن ئعزَّر جار ن رحق ذ رباطر وا ئصدْجْحن الآياث نس رسقنت ئشتن غا ثنَّضَّن ذ تخسارث ء ين ذايس ئسمحن نيغ ؤثحسيبن ذ اربح ء ون ئث ئقارن ذ ون ئث ئحفضن ذ ون ئث ئيسغوران ذ ون زايس ئخدمن ما ئثدجيم ءا ئوذان خزارث ءا ئمسرمن القرآن ذ أوار ن ربِّ أزُّون اث سكَمضن اثن ئسَّكَمض ربِّ مرا خذمنت دَّاغرن مرا سكَمضنث نيشان را نثنين اذ كَمضن اذَّعقن أذْعَاق ربِّ ئخس غا ئعرمن ثوذارث ن ذا اتراح س رموث اذموثن غا ثوذارث ن لْبَرْزَخ اذكّوجن اذنْسن ذي طرام ؤنضر وا زمَّان اذنفكَّن ئخسان اذطُّوقزن اذوَّان اذاغن ذي ثوذارث ن ذِيها من كُِّين ذا اث سْنَن ذي ثوذارث ن ذِيها ريد ذ أذوار اد ذورن ذي ثوذارث ن ذِيها ريد ذ رموث اذمثن ذي ثوذارث ن ذِيها جَّنَّث ؤتِّيذْفن ذي ثوذارث ن ذِيها ذي ثمسِّي اذ زَذْغَن رعذاب اذ ئذوم أرحمث ؤتِّيفَن رعذاب اذئذوم أرحمث ؤتِّيفَن أشهبار محمد 09-2010

دجيرث ذ ؤزير سحس ءا ثومات مرا دجيرث ثكّس أزير ئضور نشنين نخس انطّس ثفويث ثسننا نويس نارني نويس أريمث ثهارا ئوّا ؤغوس ئهتّس ويتيد غا يارن ما نزمار ات نخدجس سحس ءا ثومات مرا أزير ئكّس ثدجسث ثوغا نويس نارني نويس ثضارد ثصمض  أجريس ئجارس ما نزمار انزار س ثط ما انضرس ما اتيري ثووري برا أزير انخمّس انسبب انعارس اناجم اناوس انضو اناس اناري انخارس ويثيذ غا يارن ما نزمار اث نخدجس ما نزمار اثيذ نار انتوارا ذايس نسّن ربي ئمغار ئطرايا موخ ئخس أقث وحذس ؤذين حد أكيذس شك ذ نش ذ وين أطاس ذانغ يوذس ئخسا اث نخس أموخ ذانغ ئخس اث نعبذ س ؤر س ثزادجيث اث ناذس انغار القرءان ئبريس اث نسنفقس ثذت اتنسسو رباطر اس نحرس اس نغز انضر اث ننضر اث نافس من ئدجان ذ أعفان مرا ئغمس اس نرس من ئدجان ذ أصبحان انمون اث نعارس أشهبار محمد تمارة: 2007.04

مكة ءا مومو ن ثمورث م رقصور ئشمرارن م رقصور ئزيرارن ئريون مغارن ئوذان تاسند غام س ؤراون حارن تاسند زي مكور أمشان خسن أشم زارن تاسند ذ ئمسرمن تلبَّان تنوقارن هوكَُّاند ئمطَّاون ذي ثمورث طصارن رجمن شِّيطان ون ئثن ئطضفارن زى أمان نْ زمزم سسَّن طْشَارن جار ن صَّفا ذ لْمَروَا تارين طَّارن رزُّون ثزيوضِي ن أرحمث خ ربِّي تْكارن تذحان اَمُوخ ئد ؤرورن خْمي ئتكمَّارن طروَّاحن غا ثوذرين غا رواشون تذوارن مايس كّين ذْ مِن زْرين فترنث ذى أوارن س ؤمزيان ذ ؤمقران فارحن تنوَّارن سُويَا نش ؤريغد خَام اشتويا و أوارن مرا ثوارم عاذ اذايم سَّاريغ س ئضارن س ثطاوين اذزارغ ذين رقصور ئمغارن را نش اشم زورغ ءا مكّة ئشوَّارن را نش اشم زورغ ءا مكة ئشوَّارن أشهبار محمد تمارة  : 08-04-2007   Mohamed Achahbar · مكة.m4a

ثسنذ نيغ وا ثسّينذ -1- ثسنذ نيغ وا ثسّينذ مرا ثسنذ سقار مرا وا ثسّينذ سقسا وا تعفّار مرا حد يَمزي غاش ؤثتسحقار قا تارذ ذ والو اد ئفغ ذ فيغار اغاس ثازيض س ثقّسث اش ئزبار روخن اتاشيذ اتارذ ربار اتافذ ذ شك ئ زوارن ذ أمزوار مرا حد يوعرا غاش ؤذاس تاذار قا مرا ثوذارذ اش ئسّك خ وأدّار اش يار ؤثدجيذ اش ئكْ سادو ؤراثار اش ئقّن ذي ثسيريث  اخاش ئعجن س ؤضار اتاعيذ خ ؤنفكّي س ؤزايض اش ئندار اتكسيذ ذي ثضوي اتنجمذ ذ رموحار -2- ثسنذ نيغ وا ثسّينذ مرا ثسنذ سقار مرا وا ثسّينذ سقسا وا تعفّار أجضيض مرا ئسّن ذي ؤمزوار ئتنوفّار ئخسّا وا يطّيو مرا وا غاس أفار قا مرا ئضوا ؤشا زرينث ئفّافار اس ندين زمضاوز ذ تخشبين خ ئسومّار اث حارن اذ ياكّب اذ ئنقب اذ ئصار اذ ياف ئخف نس ذي ثخشبث ئزيّار اذ يازو اذ ئنفك اذ ئنضو اذ ياذار اذ ياف خشّند اكيس رجْمنث زي ثنزار أجويح ئراح يوسد ئنشف ئقزّار بوحبر عاذ ذايس سيبنث ذى ئمجمار جّينث اذ ئشنف ؤماس ذايس ئخزّار وا غاس اذ ئسّيور وارا اذ يِيني مغار أشهبار محمد تمارة : 03-04-2007

ثِذت ثذت ذ رباطر ذ ئبريس ذ ؤثاراس ثذت ذ أبريذ ئسكْذن غا ثفراس رباطر ذ جّاف ؤيصدجحن ئ رعراس أثاراس ئقاز ئسارايد أدساس ئتاسد ئبريس ئمّار ياردراس مرا ؤذاس ئزمار ئطمارد خاس كْ سا سيه ؤتك أدجي ئباروياس كْ سا سيه ؤتك ضار ئعطماس انف ؤتاذف بارم س ثغماس مرا ذ نّيّث قساس كساس س ؤغيدج حوس جّاس أدجاس مرا يزرا زي راوّاج سيج خاس س ثمذافث نضن عاوذاس ارنياس أر غا ئمخس ثوذارث ضحش خاس ذ وا ذ أبريذ ئسكذن ئمنحاس تون ذّين ذّدج تمنغان خاس تاغن خ رمسكين تّجار تذارنّاس أشهبار محمد تمارة: 2007.04.02

مرا نش ارزفغ مرا ثقضاي ثوذارث صافي نزفغ نش تيري مّوثغ ساني ارزفغ ثطاوين اركزنت بوحبر ئفّغ ئذمّن ؤزغن نجبذغ نسكفغ زي ثوذارثا فغغ صورفغ غا ؤنضر ذى شار ؤذفغ غا ثوذارثين صافي ؤنفغ والله ئما سنغ ماي غا كّغ ما ذي جّنّث ئ غا زذغغ س أرحمث ن ربي ات اذفغ زي رخير نس اذ قّاسغ اذ هنيغ اذ شّغ اذ سوغ ما غا ثمسي ئ غا راحغ اذ فسيغ ذي رحمو اذ صارغ الله ئحفظ زي من قّارغ والله ئما سنغ ماي غا كّغ اتيغ جّنّث ات زذغغ اذ فاحغ س أرحمث ن ربي اتيغ ات اذفغ س أرحمث ن ربي اتيغ ات اذفغ أشهبار محمد تمارة: 03-2007

ثوذارث ؤضارون -1- ثوذارث ئ نتدّار ثدّار س ؤضارون ون ئكُّورن س نيّث تحامان اث غرون تكَّن مّارنّاس سوجاذن اث ندون طراجان اذ ئمّث تشّن خاس رعابون س ؤسغرس ازّون اس تافن اث ازون حما زايس هنان خ رمحمر اث ابون اس كَّن ثمنزا خ ؤنضر ذ أعدجون اذ ئسمض ؤر نسن اذ دزن ذىْ أدجون -2- ثوذارث ئ نتدّار ثدّار س ؤضارون ون ئكُّورن س ؤسغرس ياخو زىْ أصغون قاناش فرانين ذ راصر ذ أميمون فرانين ذ أصبحان ئراح ذايس ئمون فرانين ئسضوقوز ئسفوروج وي ئترون فرانين قا ئمثن نهرا يابّا أنتون س ؤخلّس ئذكّن أشكار ئتسنسون يلّه اث ناذس ارواح اكيس نمون أشهبار محمد تمارة: 25-03-2007

  نش زي المغرب نش زي المغرب زي أريف ئنو ئشنان أميس ن الحسيمة ام ربحار يارصّان أميس ن نكور س ئذمّن ذ ئزوران أميس ن رحد أميس ن ثعورث ئيّان ؤرورد ذي منوذ غريغ ذين ذ أغودان غريغ ذين سين ئسكُّوسا زى ْ  ؤسّان ويس كراظ هويغ غا بيّا ذ أمزيان زاذغ ذي ثغوري تكاراغ ئدلسان ؤسّان تراحن تاسند أغانيب ذى ئضوضان أبريذ ئسكْذن ذ أبريذ ئنو نيشان أبريذ ئفاغن وا ذايس تكَّغ ئضان تبريغ وا ؤكِيغ زي ثيرا ن ئزران ثيط ثخزّار مومو ذ أبر تنهزّان ضار ذىْ ضار س ثكري هارزن رزان فوس ئتاري ئخف ذ أدجي تننّان فوّارن سمضن عاوذن صفضن محان أشهبار ذ أشهبار أميس ن ثعورث ئيّان أميس ن نكور س ئذمّن ذ ئزوران أميس ن المغرب زي بيّا يارصّان أميس ن أريف، أريف ئنو ئشنان أشهبار محمد تمارة: 09-03-2007