فاق شك سفاق
-1-
فاق شك سفاق اذ فاقن ئوذان
قا مارّا انمّث انذور غا ئمضران
انذور غا ؤشار غا طرام ذ رحصران
اموخ ذورن رجنوس ئفاثن عذان
شحار ئرا جهذن امن نثنين فنان
ئقيم غا من كِّين ئصبح ماذ أعفّان
مايكا رقصوراث ئرا زذغن بنان
ئزوقن سرزواق ئريون ؤعران
قّاع فزّارن قشّارن اذرن وضان
ذورن ذ ئخابار ئثباب نسن محان
ئغميد خاسن أربيع ذ بوزيزو ئقوان
يوزّغ عاوذ ئغميد ؤسّان تراحن قطّان
ام وأمان ئتازرن بّاروين نيغ صفان
ئهوكَّان ذي ثيسارث ئتفغن غا ئغزران
ئتاوين غا ربحار ن ثوذارث يارصّان
ثوذارث ويس سين ثني ذانغ ئطراجان
اتيغ اغاس نانف انارزف ذي رامان
س أرحمث اتناذف ئمسرمن اترقان
13/25-02-2007
-2-
فاق شك سفاق اذ فاقن ئوذان
قا مارّا انمّث انزذغ ئمضران
شك ذ نتا ذ وين ذ يِن ذانغ ئ تسران
ئنيثايد ماي كّين رجذوذ نّغ ئ عذان
ئك ئقذن أرومي جّين ذايس أسنّان
ئنيثايد مايكا باباثنغ أمقران
ئك ئمسر ربي ئكَّا ذايس ئيمان
ماي كّين ئرقّاصن ئد يوسين اذ هذان
ادارن غا ؤبريذ اذ سفاقن ئوذان
حما اذ عبذن ربي اذ عصان شّيطان
مارّا مّوثن ودّارن ذ شار ئذحان
مايكا نوح ئك ئترون ئروبان
رقوم نس ئغاق س طّوفان وا ئبان
مايكا ئبراهيم ون ئذانغ ئسمّان
ئخضارانغ ئسم شحار ئدجا ذ أصبحان
مايكا يوسف ئسودّارن ذ أمزيان
ئوشاس ربي يزري ام نّور ن ئثران
مايكا أيوب ئصبارن ئتوابران
ياريث ربي زى ئمغار ذ أمزيان
مايكا داود ذ أمّيس سليمان
ئوشاس ربي أجرا زي مارّا من ئدجان
ئتحكام خ جنون ئتفهام ئ لحيوان
ئموث وا ثفقيذن اث افن جّامان
ثمراسنث دّابث ثجّيثن صعان
ذين ئسنن ئلا ربي ذ أمقران
مايكا موسى ئ يوثين ذىْ أمان
ئجّا أبريذ ذي ربحار نتا ذ وي كيس عذان
فرعون ذ وي كيس غاقن ذين هوان
مايكا عيسى ئتوافعن غا ئجنوان
تغيراسن نغينث نتا عاذ اد ئبان
اذ ئقضا خ دّجّار ذي ؤنكَّارو ن زمان
مايكا محمد (ص) ئديوين القرءان
ئزّيزكاس ربي ؤر س ثازيوضي ن الإيمان
أوار ن ربي ئقّاز ئتاذف ذىْ ئيمان
ين ئدجان ذ ئمسرمن تافن مارّا نيشان
تمونن طزادجان س ؤراون ئصفان
ين ئدجان كفارن ؤر نسن ذ أبرشان
ئخسان تعجيجّين خمي ذاس سحسّان
اثنتافذ سنن مشا ضفارن شّيطان
قّاناش جّانغ انسّعذو ؤسّان
سّاغ ءاي أمدّوكر ئج ن سِنتا ئزران
انكّار انشضح وي ذانغ ئتواران
نثنين غفرن تّون من ثن ئطراجان
ثطراجاثن رموث ذ وأرزاف غا ئمضران
طراجانثن ئسقسان أيّاو شحار وعان
زي وام ئد ؤرورن ارام ئد مغان
من جّين ذ من زرين ئقبح ما ذ أصبحان
اثافن زذاث نسن أمزيان أمقران
اثافن ذ تذت وا زمّان اذ نكان
وا زمّان اذ شتحن ورا اذ سوخّان
وا زمّان اذ شتحن ورا اذ سوخّان
16/28-02-2007
أشهبار محمد
تمارة:
تعليقات
إرسال تعليق