روحن ؤسَّان ؤسيند
(1)
روحن ؤسَّان ؤسيند اقاي ذي رفيافي
كَّْورغ ذى أبريذ تعججِّيغ س ثِوكُْذي
ؤفيغ ذين أمتِّين ئقطعايد زذاثي
ؤر ئنو ئخدَّم وا بغيضغ اذ ييري
سِّيورغ غاس سدجمغ خاس س ربِّي
سَّقسيغ مامش اديار خافي يوكَْي
خزارغ ئج ن رخزراث بدَّغ ئج ؤبدِّي
س وأرشام ن ثطاوين ذ ؤحراب ذ ؤحاذي
نخرعغ راقيغ ؤفيغ حد اكيذي
زغيراي ذ شواطن ئكَْ ئخزا ربِّي
زِخنت ذ تسكُّورث ثقَقَاشث ن ئيري
ؤشيغاس اتعرف س ئرذن ذ ئمندي
س ؤيثماس قا تتَّنت ما نتَّاث قا ثوكَْي
ثقِّيم ثخزَّار ثتميَّاز من تغا ثيني
نّيغاس من شم يوغن ثسنعمير وا ثتسري
عاوذغ اس سقسيغت ثنَّاي ذاي ثمسِّي
نيغاس وام ثضويذ ما كَِّْينام رحنِّي
ثقِّيم ثخزَّار ثضحشد غاري
ثنّاي قا ذ شَّك ئرا خسغ زي ثمزي
عقرغ أوار نّش صنثغاس امنِّي
صنثغاس ذي رمنام ثسِّيورد غاري
نيغاس أوار ثناي امنّي
ثسخيقاي ئج و أس س أرّاي وا تكَِّْي
نيغاس اقا شم ذين ارزو حد نضني
نش قا ثسخيقذَّاي ثنيذ ؤدجِي امنّي.
(2)
روحن ؤسان ؤسيند ثتسقسا خافي
ثندم خ من ثخذم اكيذي وا ثوشي
ؤرجيغت نش ذي رمنام ثسيورد غاري
ثنَّاي ئسم نّش ذى ؤر ئنو ئغمي
زي نهارا ثوذشَّا رفراق ؤيتغيمي
تتارغ سمحث اتيريذ اكذي
مرا ئحن ؤر نّش ثذورد غاري
فاقغد زى ئيضس ؤفيغت زذاثي
ثطاوين حمَّارنت أمطَّا ذ أحبِّي
ام رحب ن أرمَّان ئسرفاود خافي
فوذ نس مخ جنيغ ئشاش ذين ؤساشي
نيغاس من ثنّيذ ما ئرا اقاشم اكيذي
ثقِّيم ثخزَّار ثعضر وا خافي تاري
ثنَّاي ما ثسدجذ مند نِّيغ زي مرمي
نيغاس من ثقارذ موحار ماذ يِيري
ماي سنغ من خافي يورا ربّي
ماذ ئريغ اكيذم نيغ اكَْ حد نَّضني
س ؤقموم ذ وأوار كورشي اثنيني
انخزار ثذت من ذانغ غا ثيني
(3)
روحن ؤسان ؤسيند ثتفكّار ذاكَِْي
ثنَّاي وا بغِيضغ ات سيورذ خافي
اتاريذ ثقسّيسث خ ئخفنّش اكيذي
نيغاس مري ثخسذ ثزْيوضي ن ثايري
ئري ثعشارذاي ئمشحار زيوامي
رخو من ثقَّارذ اس نعاوذ أسيفي
نش ذ شم انيري را ذ ئج ؤذانغ ئوطِّي
مرا نّيغ ثذت ات قبرذ زَّاكُِْي
مرا خضيغ ئنياي ؤدجِي امنِّي
بذيغ تروغ خ ثسعذيث ئ غاري
زريناي شا ئذسن ؤر نسن ئحاري
رزُّون اذ محان أدجي ئنو س ثمدجي
رزُّون اذ اي سوسن ربِّي ئبد اكذي
شحار ئسِّيجرن سيورن رمعاني
نَّان أوارن ئشنا شا وا يشني
مشا ثسكُّورث عمّاس وا سن ثتسري
ثسّن من قَّارن ذ رخيار ؤمنغي
نتّاث ثخس ات ئيذار اكيذي
برا نش وا ثتيف حد نَّضني
(4)
روحن ؤسّان ؤسيند اقاي ذ أوحذاني
كَُّورغ ذى أبريذ ؤسّينغ ماني
رعقر ئنو ئفَّغ ذورغ ذ أزهواني
ئمنوسن غزّنّاي ؤر وايهني
قيمغ سّوارغ كَُّْورغ حِذي وحذي
قارغ اس موخ ثمسار أغريب ؤيتغيمي
ؤيسِّين أوار مكَْ غا ئفكَّار اث يِيني
من ئدجان زذاثس ؤث ئسِّين ؤث ئتويري
نتَّا عراين اذ ئبُّوهري
استِق ئنفَّح ثمشونت نِّي
ون ذايس غا ئخزارن ئتعججِّي
ام ون ذِي ثدجسث ثفاوث ؤغاس ثدجي
ئعجَّن س ئصوراف أبريذ ؤث ئكَْسِّي
طفنث ثمرُدجاي رفنار ياق ئخسِّي
ئتسرا ءِ رحس ئتضرِيس ام ئنسي
رعقر ئتواحجَّار ام ؤزرو ئمَّكسي
ئصارن ذِي ربحار ئهوكَّْان غا ثيسي
راحد وا ئتنحدي ئتفورُوي ئفسِّي
(5)
روحن ؤسان ؤسيند مونغ اكَْ رغاشي
كَْورغ ذى أبريذ قارغ أساشي
فوس ئنو ذ أقوضاض رجيوب حبّاشي
ذ ؤفكَّار ذي ثسكُّورث ؤسّا زيوامي
خزارغ ئج ن رخزراث بدَّغ ئج ؤبدّي
تواريغ ئج ؤعربوب ذى ؤجنَّا زذاثي
عراين اد ئخش ئحباباد اكيذي
ؤفيغ ذ تسكّورث ئرا اكي زِي مرمي
نيغاس قاربد قيمد اكيذي
اشم سفهمغ خ من را ثنويذ زي مرمي
ارزم ؤر نم واتيري ذ أريري
ثماكَِّْيت ئقسحن رهون اغاس يِيري
ثماكَِّْيت ئسهرن رقسح وا خاس ئضري
(6)
روحن ؤسان ؤسيند مونغ اكَْ رغاشي
كَْورغ ذى أبريذ قارغ أساشي
ئمنوسن غزَّنَّاي رجيوب حبّاشي
ؤريغد ذ أمتلوع من نوكَِّْيغ وا ئتيري
امَّني نش ذ أيوجير أمطَّا ئنغايِ
كِّيغ خ ئج ؤبريذ أنزار ئسريرايِ
ؤفيغ ذين ثحنجيرث ثترو ثسرويايِ
ئشَّاث خاس ؤنزار نتاث ثزِّدجزايِ
يزْريْ نس ئشوار ام طيا ن ثزيري
ام نور ن ئثران رخزراث نس غاري
نيغاس وار ترو ام وأدُّوذ أشضبي
أمطَّا نِّ ثتروذ ئذحام ذ تمسِّي
حذيغت زِ ؤزدجيف أشوكض ئنغايِ
فوس ئنو ئنَّزبار رحّيق نس ذايِ
سقسيغت خ ئماس ثناي هْدَا امنِّي
ئما ئنو قا ثموث ات يارحم ربِّي
نيغاس ءِ بابام ثترو ثخزارد غاري
ثنَّاي بابا ئمرش وا ئقِّيم امنِّي
ربدا ذ ئمخمبار اكَْ ثمغارث نضني
نش ثشاهاي وا ذاي ثتويري
ثاراي ام ثمحراسث ثترَفايِ
أغروم ذاي ثتيش ثتسيَّابِث ئذ خافي
اقاي غاس ذ تربيبث أربيب وا ئسَوِّي
ثتحبابا خ ثاروا نس نش ثنقَّايِ
وامِ غاسن ؤزيغ بابا ئسمح ذايِ
قيمغ ذ تايوجرث أرَّاي ئودرايِ
وخَّا ذين ثرلّي ثسعذيث وا غاري
س منايا ئتروغ اي ؤما زي مرمي
مري غاري يمَّا ئري ثحضا خافي
بابا وا ئتيمن تاشنا من غا ثيني
س منايا ئتروغ مغار نش وا غاري
باب ئنو ئهجار أرَّاي وا غاس ئدجي
ئصوروف ذى ؤبريذ رثار نس ذ تمدجي
رخو نش تعايانغ اذ ئحن ربِّي
اذ ئبدّر ؤسّان س ثزيوضي ذ تشوني
ئفاسن اذ مونن ثعججّوث وا ثتيري
نيغاس بابام ما ن أبريذ ئكَْ ئوِّي
ثناي هْدا ئشفا ستوك جِّيث امنِّي
مري سنغ ماني ئري نيغاشت مرمي
وامي زريغ ثيوجيرث ثترو ثسرويايِ
ثقَّن ثاسبنيث ياسا خاس ئزري
ئصوضد ؤسمّيض ئصوضيث وا ثوشي
سضفارغ اس ثطاوين ثشيَّارد غاري
أشيَّأر ؤمصفاض ؤر نغ قا يوكَِْي
ثنايد ئج و أوار زي ربار وا ئمحِّي
اث ئنيغ ؤث قيرغ اث جَّغ ئنغايِ
سمحاي اش سقسيغ مشا ارد خافي
ما روحن ؤسَّان ؤسيند رخو غاري
ما كَِّورغ س تذت ما تارجيغ ؤصافي
ما كَِّورغ س تذت ما تارجيغ ؤصافي
أشهبار محمد
امنود : صيف 1999
تعليقات
إرسال تعليق