070 سبحان الخالق

سبحان الخالق

سبحان الخالق ئضوَّان ئجنوان
ئخرق ثفوشث ئخرق را ذ ئثران
ئخرق ئصفضاون ارجمن شِّيطان
ئخرق ثمورث ذ روضا ذ ئعوران
ئخرق ثسجُّورا ذ تكَْانين ئقوان
ئخرق ربحار يِيذار ذايس ئسرمان
ئخرق بناذم زٍ ؤشار ذ و أمان
ئكَْاس ؤذم ذ ؤقمُّوم ذ ئمجَّان
ئكَْاس ئضارن ذ ئفاسَّن ذ ئضوضان
ئكَْاس ئذمَّن تازرن ذكَْ ئزوران
ئكَْاس ؤر ئزاع ذايس ئيمان

سبحان الخالق ئضوَّان ئجنوان
ربِّ ئسَّن ئتوارا مِن ئدجان
أقث اكَْ وين ذ وين ئسَّن مِخ تمشذكَان
ئسَّن من تكَّْن يومار وِكَْ ئتزمَّان
يومار وِكَْ ئتطفن بوحبر ءِ ئوذان
ئخسَّانغ انمون ام ستفن ئضوضان
انطَّف ذِ دِّين نغ انغار القرآن
انعبذ ربِّ س ؤر نغ ئصفان
انعصا ئبريس رعذو نغ أبرشان
قَ مارَّا انمَّث انذوَر غا ئمضران
انمُّوتي زِ ثا غا ثوذارث ئديوكَّْان

ون غا ياربحن اذياف كورشي نيشان
اذياف ذين جنَّث ذايس اطَّاس ئغزران
ها ئغزران ن ثمَّنت ها ئغزران و أمان
ها ئغزران ن ؤغي ئزيضن ارصَّان
ها ئغزران ئزذيكَْن ئريون زَّكَْران
ذين رخير مسقَّم ذين رقصوراث بْنان
ذين من ؤزرينت ثطازين ذ من ؤسرين ئمجّان
ءِ ون غا ئخصارن ذ أعشير ن شِّيطان
نعرنث الملائكة نعرنث را ذ ئسرمان
ذِ جهنم يا لطيف اكَْ قارون ذ هامان
ذكَْ ئغزران ن ثمسِّي ايَّاو شحار حمان
ايّاو شحار ؤدجغن ايّاو شحار هْوان
سّفساين سننَّان ون ذايسن غا ئوضان
ئصبَّار اَ ربِّ ون ئثن غا ئرقان
ئصبار اَ ربِّ ون ئثن غا ئرقان

أشهبار محمد
تمارة:
19-12-2006